Шинэ Эрин олон улсын сургуулийн үе үеийн эрдэмтэн багш, ажилчид, төгсөгчид, сурагч, эцэг эх, асран хамгаалагч, харгалзан дэмжигчид, хамт олон, хамтрагч байгууллагууд болон хувь хүмүүстээ Шинэ эрин олонулсын сургууль үүсгэн байгуулагдсаны 15 жилийн ойн баярын мэндийг хүргэе!

2010 онд “Шинэ үеийн боловсролын орчин, дэлхийн түвшинд суралцах боломж”-ийг бий болгох зорилгоор байгуулагдсан манай сургууль өнөөдөр Монгол Улсад Кембрижийн олон улсын хөтөлбөрийг хэрэгжүүлсэн,анхны төрийн өмчит сургууль болон оршин тогтнож, боловсролын шинэчлэлийн жишгийг тогтоосон байна.

Энэхүү түүхэн замналыг эхлүүлж, байгуулагдах цагаас эхлэн 12 жилийн хугацаанд удирдан чиглүүлсэн анхны захирал Болдын Амартүвшин танд энэ өндөрлөгт хүрэх суурийг тавьсан гавьяанд тань гүн талархал илэрхийлье. Таны удирдлага, манлайлал, шинэчлэлийн зоримог шийдлүүд, олон улсын боловсролыг нутагшуулах хөрсийг бүрдүүлсэн хөдөлмөр, зүтгэлээр “Шинэ Эрин”-ий амжилтын эхлэл тавигдаж, өнөөдрийн хөгжлийн бат бөх үндэс бүрэлдсэн билээ.

Өнгөрсөн 15 жилийн хугацаанд бид хамтдаа олон сорилт, шинэ эхлэл, тасралтгүй өсөлт, амжилтын арвин түүхийг бүтээж ирлээ. Энэ бүхэн нь бидний үе үеийн удирдлага, эрдэмтэн багш, ажилтан, төгсөгчид, сурагч, эцэг эх, асран хамгаалагч, харгалзан дэмжигчид, хамт олон, хамтрагч байгууллагууд болон хувь хүмүүсийн итгэл, сэтгэл, хичээл зүтгэлийн үр дүн юм. 

“Шинэ Эрин” бол зөвхөн сургууль биш ирээдүйг бүтээх мөрөөдлийн эхлэл, дэлхийн боловсролын гүүр, хүүхэд бүрийн давуу тал, авьяас, чадварыг нээх итгэлийн талбар юм.

Өнөөдөр бид өнгөрсөн он жилүүдийнхээ амжилтад талархан, ирээдүйн 15 жилийг илүү өргөн хүрээтэй, инновац, хамтын хөгжил, тогтвортой чанарын шинэ шатанд хүргэхээр зорин ажиллаж байна.

Сургууль үүсгэн байгуулагдахаас эхлээд хөгжлийн бүх үе шатанд чин сэтгэлээр дэмжиж, хамтдаа алхсан та бүхэндээ дахин талархал илэрхийлье. 

Хүүхэд бүрийн ирээдүй гэрэлтэй, боловсролын замнал итгэлээр дүүрэн байх болтугай!